Azərbaycanın Milli Qəhrəmanı Mübariz İbrahimovun adı Tovuzda əbədiləşdirilib.

Tovuz rayonunun Əsrik dərəsi ərazisində “Mübariz bulağı” komleksi tikilib, bulaq yaxınlığındakı adsız zirvəyə isə “Mübariz zirvəsi” adı verilib, bu yeni adlandırılmanı bildirən lövhə vurulub.

Millət vəkili Qənirə Paşayevanın təşəbbüs&¨ və Tovuz rayon rəhbərliyinin dəstəyi ilə baş tutan bu xeyirxah iş 26 iyun – Azərbaycan Silahlı Qüvvələri yaranmasının 94-cü ildönümü münasibəti ilə, qəhrəmanın atası Ağakərim İbrahimovun iştirakı ilə ictimaiyyətə təqdim olunub.

Təqdimat-ziyarətdə Q.Paşayeva çıxış edərək, bu günü bütün iştirakçıların həyatında əlamətdar hadisə adlandırıb, bu məkanın ən çox ziyarət ediləcək ərazilərdən olacağına, yeni evlənən gənclərin, əsgər gedən oğlanların gəlib buranı ziyarət edəcəyinə inandığını qeyd edib.

Tovuz Rayon İcra Hakimiyyətinin başçısı Tofiq Zeynalov bildirib ki, bulaq-kompleksin ərazisi yaxın günlərdə daha da böyüdüləcək və abadlaşdırılacaq. Ərazidə qəhrəman gizirin heykəli ucaldılacaq.

Heykəlin maketinin artıq hazır olduğunu deyən icra başçısı, heykəl üzərində son tamamlanma işlərinin aparıldığını diqqətə çatdırıb.

Qəhrəmanın atası A.İbrahimov bulaq-kompleksin açılışından çox duyğulandığını deyib, bu işdə əməyi keçən hər kəsə öz təşəkkürlərini bildirib.

 Açılışdan sonra ictimaiyyət nümayəndələri Milli Qəhrəmanın atası Ağakərim İbrahimovla bulaq önündə xatirə şəkilləri çəkdiriblər.