Üç əsrin acısını-şirinini yaşayan Gözəl nənə 1889-cu ildə Şamaxıda anadan olub.

Hazırda Ağdaşın Orta Qəsl kəndində yaşayan uzunömürlü Gözəl nənə ömrünün maraqlı məqamlarından, zaman-zaman ermənilər tərəfindən xalqımızın başına gətirilən müsibətlərdən söz açıb. O, düşmənlərimiz olan ermənilərin 1918-ci ildə azərbaycanlılara tutduğu divanı, həmvətənlərimizə verdikləri işgəncələri gözləri ilə gördüyünü bildirib.

Gözəl nənənin ailəsi kasıb və zəhmətkeş olub. O, beş övladını çox çətinliklə böyüdüb, boya -başa çatdırıb. Nənə hazırda nəvə-nəticələrinin, kötücələrinin ağbirçəyi olaraq böyük bir nəslə rəhbərlik edir. Gözəl nənənin 5 övladı, 10 nəvəsi, 19 nəticəsi, 7 kötücəsi var.

Gözəl nənə 1941-1945-ci illərdə Böyük Vətən Müharibəsində arxa cəbhədə insanların necə aclıq keçirdiyini və xəstəlikdən əziyyət çəkdiyini gözləri önündə canlandırır. Gözəl nənə təxminən 90 il kolxozda işləyib. Üzüm, pambıq, taxıl yetişdirib, zəhmət çəkib, halal çörək qazanıb. Gənclik illərində tüfənglə sərras atəş açdığını, yaxşı at çapdığını deyən Gözəl nənə üzün müddət yaylaq və qışlaqda mal-qara bəslədiyini bildirib.

124 yaşlı nənə heç bir dərman preparatı da qəbul etməyib. O özünü sağlam hiss edir. Gözəl nənə xarici görünüşünə görə, onunla birgə yaşayan 83 yaşlı gəlinindən də cavan görünür. Onun ailəsi əmindir ki, əgər 124 yaşlı Gözəl nənənin adının “Ginnesin rekordlar kitabı”na salınması üçün müraciət edilsə və onun yaşını metrik ölçülərlə yoxlasalar, onun planetin ən qoca sakini olması faktı təsdiqlənər.

Gözəl nənə 125 illik yubileyinin dövlət tərəfindən qeyd olunmasını istəyir. 125 yaşlı qadın bu il prezident seçkilərində də könüllü olaraq iştirak edib. O, seçki məntəqəsinə gedərək səsvermədə iştirak edib.