Allahın sevdiyi bir qul gecə bir yuxu görür. Yuxuda ona belə deyilir: “Sabah qarşına ilk çıxanı ye, ikinci çıxanı gizlə, üçüncünün diləyini yerinə yetir, dördüncünü məyus etmə, beşincidən isə uzaqlaş!”
Adam hövlnak yuxudan oyanır. Yuxu ona tam aydın deyildi. Yenə də bu yuxunun adi bir yuxu olmadığını anlayır. Çölə çıxır. Əvvəlcə bir dağla rastlaşır. Birinci rastlaşdığını yeməliydi. Bu böyüklükdə dağı necə yeyəcəkdi? Ancaq yuxusuna inanmışdı. Dağa doğru yeridi. Ancaq bir də nə görsə yaxşıdır? Dağa yaxınlaşdıqca dağ kiçilirdi. Hətta o qədər kiçilir ki, balaca bir loğmaya çevrilir. O, loğmanı yeyir və yoluna davam edir.
Qarşısına bir ləyən çıxır. Yuxuya görə, bu ləyəni gizlətməli idi. Torpağı qazır və onu basdırır. Yenidən yola davam etmək istəyəndə ləyənin üzə çıxdığını görür. Bir daha basdırır. Ancaq yenə ləyən üzə çıxır... Bir daha... Bir daha... Ancaq yenə də bir xeyri olmur. O, əlindən gələni etmişdi. Buna görə də yoluna davam edir...
Bu dəfə qarşısına bir quş çıxır. Bu quşu bir şahin qovurdu. Quş dil açıb: “Ey Allahın qulu, mənə kömək et, məni gizlət”, - deyir. O adam quşu qoynunda gizlədir. Bu dəfə isə şahin dilə gəlir: “Bu gün heç nə yeməmişəm, o quşu burax yeyim”. Adam çaşıb qalır: dördüncünü məyus etməməli, istəyini yerinə yetirməli idi. Bıçağını çıxarır və öz budundan kəsib şahinə verir.
Beşinci qarşılaşdığı isə leş olur. Ondan uzaqlaşmalı idi. Elə də edir və leşdən uzaqlaşır. Evinə gəlir. Axşam belə bir dua edib yatır: “Allahım, yuxumda mənə əmr etdiklərini yerinə yetirdim. Hikmətini tam anlamadım, ancaq riayət etdim. Hər şeyin ən doğrusunu bilən Sənsən”. Gecə yenə yuxu görür. Bu yuxuda gündüz etdiklərinin hikməti açıqlanır: “Birinci rastlaşdığın dağ hirs və əsəbindir. Səbirlə onun üzərinə getdikcə kiçildi və sən onu yedin, dadından da zövq aldın. İkinci qarşılaşdığın gözəl əməllərindir. Onları nə qədər gizləsən də, mütləq üzə çıxır. Üçüncüsü, sənə verilən əmanətdir, nə olur-olsun, ona sahib çıxmalısan. Dördüncüsü, diləkdir, insanların diləklərini yerinə yetirməlisən. Beşincisi isə qeybətdir. Qeybət edən insanlardan leşdən qaçan kimi qaçmalısan”...


PS Səbr edib oxuduğunuz üçün təşəkkür edirəm