UEFA “Şaxtyor”un futbolçusunu cəzalandırdı 

UEFA İntizam Komitəsi Ukraynanın “Şaxtyor” klubunun futbolçusu Luis Adrianonu cəzalandırıb.

Braziliyalı hücumçu Danimarka “Nordşelland”ı ilə Çempionlar Liqası matçında “fair-play” prinsipini pozduğu üçün bir matçlıq diskvalifikasiya olunub. O, sonuncu turda İtaliya “Yuventus”una qarşı ev oyununu buraxmalı olacaq. Eyni zamanda “sambaçı” bir gününü futbol ictimaiyyətinin xidmətində keçirəcək.

Qeyd edək ki, Luis Adriano “Nordşelland”la görüşün 26-cı dəqiqəsində topu rəqibə vermək əvəzinə qapıçı ilə təkbətək çıxıb və qol vurub. Görüş “Şaxtyor”un qələbəsi ilə nəticələnib. “Yuventus”la qarşılaşma dekabrın 5-də Ukraynanın Donetsk şəhərindəki “Donbass Arena”da baş tutacaq.

Dünyanın ən çox qazanan futbol məşqçiləri 

İspaniyanın “Real Madrid” futbol klubunun baş məşqçisi Joze Mourinyo dünyada ən çox məvacib alan məşqçidir.

Braziliyanın “Pluri Consultoria” konsaltinq agentliyinin tərtib etdiyi siyahıya əsasən, illik 15,3 milyon avro məbləğində məvacib alan Mourinyo ən bahalı məşqçidir. Siyahıda ilk üçlüyə Fransa PSJ-sini çalışdıran Karlo Ançelotti (13,5 milyon avro) və Çinin “Quançjou” klubunu çalışdıran məşhur italiyalı məşqçi Marçello Lippi (10 milyon avro) daxildir. İngiltərənin “Mançester Yunayted” klubunun 20 ildən çoxdur ki baş məşqçisi postunda çalışan Aleks Ferqyusson isə 9,4 milyon avroluq illik məvaciblə siyahıda 4-cüdür. 5-ci yerdə “Arsenal”ın baş məşqçisi Arsen Vengerdir. Onun məvacibi illik 9,3 milyon avrodur. Əsasən yığma komandalarla böyük uğurlara imza atmış hollandiyalı Quus Hiddink Mahaçqalanın “Anji” futbol klubunda qazandığı 8,3 milyon avro ilə 6-cı yerdədir. Hiddinkin keçmiş iş yeri olan Rusiya yığmasına hazırda rəhbərlik edən Fabio Kapello isə 7,8 milyon avro ilə 7-cidir. Son illərin futbol hegemonu, İspaniya klubu “Barselona”nın hazırkı məşqçisi Tito Vilanova 7 milyon avro qazanır və braziliyalı ekspertlərin tərtib etdiyi siyahıda 8-cidir. Bir vaxtlar İspaniya yığmasına rəhbərlik edən Xose Antonio Kamaço Çin yığmasına baş məşqçiliyə görə ildə 5,9 milyon qazanır. Bu, 9-cu göstəricidir.

Ən varlı məşqçilərin siyahısını isə İngiltərədə son illər güclü kollektivə çevrilən “Mançester Siti” klubunun baş məşqçisi Roberto Mançini (5,9 milyon avro) tamamlayır.

“Çelsi” alman hücumçuya görə 65 milyon dollar təklif edir

Londonun “Çelsi” futbol klubu qış transfer dövründə “Bavariya”nın forvardı Mario Qomeslə güclənmək niyyətindədir.

Xarici KİV-in verdiyi məlumata görə, Roman Abramoviçin komandası münhenlilərə Qomesə görə 65 milyon dollar ödəməyə hazırdır.

Qeyd edək ki, Qomes zədəsini təzəlikcə sağaldıb. “Çelsi”, həmçinin “Atletiko Madrid”in kolumbiyalı hücumçusu Radamel Falkaonu sıralarına qatmaq niyyətindədir.

PSJ-nin Kriştiano Ronaldo israrı davam edir.

Ulduz futbolçu “Real”da xoşbəxt olmadığını deməsindən sonra hədəfinə düşdüyü klubdan böyük məbləğdə transfer təklifi alıb. Məlumata görə, PSJ artıq transfer çalışmalarına start verib. Fransa klubu “Real”ın “Mançester Yunayted”dən 120 milyon dollara (96 milyon avro) heyətinə qatdığı Ronaldo üçün ispanlara 150 milyon dollar təklif edəcək. Bu isə ən bahalı futbolçu adını daşıyan Ronaldonun şəxsi rekordunu qıracağı deməkdi.

Fransanın RMC radiosunun məlumatına görə, Ronaldo özü də Parisə getmək istəyir. Hətta onun ispan jurnalistlərdən birinə “Parisdə yaşamaq Madriddə yaşamaqdan daha yaxşı olacaq” dediyi bildirilir.

İbrahimoviçin “Barselona”dan gedişinə Messi səbəb olub

Hazırda Fransanın PSJ komandasında çıxış edən isveçli hücumçu Zlatan İbrahimoviçin İspaniya “Barselona”sından ayrılma səbəbinə dair şok iddia ortaya atılıb. Lent.az-ın məlumatına görə, İspaniya mətbuatı səbəbkar qismində Lionel Messinin adını çəkib.

Həmin yazılarda Messi ilə İbrahimoviç arasında münaqişənin olduğu bildirilir. Konflikt argentinalı hücumçunun xeyrinə həll olunub. Messi “Barsa”nın o zamankı baş məşqçi Xosep Qvardiolaya müraciət edərək, “Komandada ya mən qalacağam, ya da İbrahimoviç” deyib. Qvardiola isə isveçli forvardın göndərilməsi barədə klub rəhbərliyinə raport təqdim edib. 

Qeyd edək ki, Zlatan İbrahimoviç “Barselona”ya 2009-cu ilin yayında İtaliya “İnter”indən keçib. O, 2010-2011-ci il mövsümünü icarə əsasında “Milan”da keçirib və ardından bu kluba satılıb. 2012-ci ilin yayında isə İbrahimoviç PSJ-yə keçib.